Lavurs
Lur lavurs èn las suandantas:
Producir pastizarias
- preparar las ingredienzas per differentas pastas, p. ex. farina, levon, sal ed aua, e calcular las quantitads necessarias da las ingredienzas
- far pastas cun maschinas da truschar
- survegliar ils process da truschar ed agiunscher las ingredienzas en la dretga successiun ed al dretg mument
- far purziuns e furmar la pasta, per exempel a pauns, a tarscholas, a stortins u a paunins da latg
- laschar levar pastas e survegliar il process da fermentaziun
- survegliar ils process da coier ed als render pli effizients per meglierar ils resultats
- producir rasadas, pastizaria da pasta sfegliada e turtas
Producir confect
- preparar las ingredienzas per pettas, turtas u cremas e calcular las quantitads necessarias da las ingredienzas
- producir pastas da bisquit, da pischada e d'alv d'ov
- preparar cremas, pia maschadar las ingredienzas cun il sbattin e metter a frestg las cremas
- preparar talgias da fritgs, p.ex. per garnir turtas
- tagliar ora funs da turtas e bisquits, stritgar crema sin quels ed als decorar, per exempel cun flocs u cun decoraziuns
- producir turtas, pettas, pastizarias e spezialitads regiunalas e stagiunalas
Producir artitgels da confisaria
- fabritgar artitgels da tschigulatta, p.ex. pralinas, lieurs da Pasca u pulvra da tschigulatta
- preparar products da basa sco fabricats mez finids, tranter auter ganache, gianduja, massa da pralinas u marzipan
- fabritgar dultschims, p.ex. gelé da fritgs, zutger caramelisà, nougat, caramellas u pralinas
- producir truffes, pralinas da liquor e tschigulatta culada
- crear regals e turtas da nozzas e d'anniversari
Liquidar incumbensas administrativas e vender products
- concepir ils andaments da lavur en moda uschè effizienta sco pussaivel, tranter auter tscherner las ingredienzas u dismetter ils ruments
- administrar il magasin ed ils inventaris da rauba
- empustar artitgels ed ingredienzas
- calcular ils pretschs per ils products
- nettegiar maschinas ed apparats
- vender ils products en butia il medem di sco quai ch'els èn vegnids producids
Scolaziun
Durada
3 onns
Direcziuns
- pasternaria-pastizaria
- pastizaria-confisaria
Furmaziun pratica
En in manaschi da pasternaria-conditoria-confisaria u en ina interpresa industriala da producziun
Furmaziun en scola
1 di per emna en la scola professiunala spezialisada
Roms professiunals
- mastergn e tecnologia
- concepir e crear
- economia da manaschi
- qualitad e segirezza
Curs ordaifer il manaschi
Emprender, approfundar ed exercitar las basas professiunalas, 10 dis durant 3 onns.
Maturitad professiunala
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Diplom
Pasterner-Pastizier-Confisier AFQ / Pasternera-Pastiziera-Confisiera AFQ, cun indicaziun dal sectur professiunal
Premissas
Furmaziun preliminara
- terminà la scola obligatorica
Pretensiuns
- bun nas e bun palat
- senn per colurs e per furmas
- inschign manual
- creativitad
- dun per cifras
- talent organisatoric
- senn per igiena
- buna sanadad e naginas allergias, eczems u asma
Furmaziun supplementara
Curs
Purschidas da scolas spezialisadas e da scolas professiunalas spezialisadas da federaziuns spezialisadas sco il Center da cumpetenzas Richemont, richemont.swiss.
Emprendissadi supplementar
Pasterners-pastiziers-confisiers e Pasterneras-pastizieras-confisieras AFQ pon per regla far in emprendissadi scursanì en l'auter sectur professiunal (1 onn) u sco cuschinier / cuschiniera AFQ (2 onns)
Praticum a l’exteriur
Cunvegnas da stagiaires cun differents pajais. Infurmaziuns en chaussa ha il Secretariat da stadi per migraziun SEM, sem.admin.ch.
Examen professiunal (EP)
P. ex. Schef pasterner-pastizier-confisier / Scheffa pastiziera-con-fisiera EP
Examen professiunal superiur (EPS)
P.ex. Mainagestiun pasternaria-pasti-zaria-confisaria dipl.
Scola spezialisada superiura (SSS)
P.ex. Tecnicist / Tecnicista sectur professiunal tecnologia da victualias dipl. SSS
Scola auta spezialisada (SAS)
Studis en secturs parentads, p.ex. bachelor of science en: scienzas da victualias ed economia da manaschi. Tut tenor la scola auta spezialisada valan differentas cundiziuns d'admissiun.
Cundiziuns da lavur
Pasterneras-pastizieras- confisieras e pasterners-pastiziers-confisiers lavuran sulets u collavuran en teams cun pasterneras-pastizieras-confisieras AFP e cun mainagestiuns da pasternaria-pastizaria-confisaria. Durant lur mintgadi da lavur liquideschan els savens parallelamain pliras incumbensas. Il cumenzament da la lavur è different e sa drizza tenor la grondezza dal manaschi e tenor il sectur professiunal. Cunzunt pasterneras-pastizieras-confisieras e pasterners-pastiziers-confisiers AFQ dal sectur professiunal pasternaria-pastizaria cumenzan la damaun marvegl cun lur lavur. Igl è pussaivel da stuair lavurar durant ils dis da festa ed avant ils firads lavuran ellas ed els dapli che uschiglio.
Pasterneras-pastizieras-confisieras e pasterners-pastiziers-confisiers AFQ chattan plazzas en pasternarias, en pastizarias, en cantinas d'interpresas, en chasas da persunas attempadas, en hotels, en restaurants ed en labors da manaschis industrials. Cun las qualificaziuns respectivas pon ellas ed els lavurar sco manadras da team, manaders da labor u sco manadras da producziun.
Ulteriuras infurmaziuns
Schweiz. Bäcker-Confiseurmeister-Verband
3001 Bern
URL: www.forme-deine-zukunft.ch