Lavurs
Ils tagliacrappa elavuran en chavas da crappa il crap natiral explotà e creeschan ordlonder differents objects. Tut tenor accent èn els activs en la branscha da construcziun u en il sectur da l'art applitgà. Quels dus sectur da lavur pon era sa cruschar. Els s'orienteschan als giavischs da lur clientella u realiseschan lur atgnas ideas.
Tagliacrappa en l'accent sculptura s'occupan cun l'elavuraziun creativa dal crap natira. Els construeschan tranter auter monuments da fossa, monuments e funtaunas. Ils objects dissegnan els l'emprim sin palpiri e creeschan sin fundament da las skizzas in model ord gip u ton. Lura suonda l'elavuraziun dal crap: cun guaffens sco il martè pneumatic, la maschina da resgiar crappa u la rudella da tagliar dattan els la furma approximativa al crap. Per la lavur fina dovran els ils guaffens tradiziunals sco il martè, il stgalper e puntgas gizzas.
Tagliacrappa en l'accent industria produceschan tocs en elavuraziun ord crap natiral u materials parentads, p.ex. cuvridas da cuschinas, mantès da fatschada e palantschieus. Els elavuran crap dir u lom da tut il mund, p.ex. marmel u granit.
Els taglian, resgia u foran ils tocs en elavuraziun tenor plan cun maschinas da CNC. L'optica dal crap è era decisiva pli tard: cun tecnicas da glimar e pulir elavuran ils tagliacrappa differentas surfatschas. Ils tocs en elavuraziun finì furneschan els al plazzal e tschentan els là.
Tagliacrappa en l'accent construcziun e renovaziun construeschan elements per renovaziun e construcziuns novas, per exempel curnischs, artgs e pitgas. En il lavuratori dissegnan els ina skizza tecnica e battan alura ils objects ord il crap. Las furmas groppas fan els cun maschinas modernas da resgiar crappa, la rudella da tagliar u il martè pneumatic. Per l'elavuraziun finala dovran els guaffens sco per exempel stgalpers plats u la cuntgadella. Ultra da quai exequeschan els era lavurs da restauraziun vid edifizis vegls. Els agiunschan ornaments vid chasas e catedralas u reconstrueschan part dad edifizis istorics.
Tagliacrappa en la direcziun art applitgà ed elavuraziun da marmel creeschan monuments da fossa ed elements da decoraziun ord crap natiral. Il crap natiral elavuran els cunzunt cun agid da maschinas, cun resgias radundas, maschinas da mular e autras maschinas modernas. Ornaments e scrittiras furman els a maun.
Scolaziun
Basa legala
Ordinaziun federala 5-6-2020
Durada
4 onns
Accents
- sculptura
- industria
- construcziun e renovaziun
- art applitgà ed elavuraziun da marmel
Furmaziun en la pratica
En in manaschi ch'elavura e sanescha crappa natirala
Furmaziun en scola
instrucziuns emnila en bloc a la scola professiunala
Roms professiunals
Exempels: dissegnar tocs en elavuraziun e plans da dischlocaziun, transportar, dischlocar e montar ils objects sin il plazzal u en il manaschi, dissegnar plans digitals, crear scrittiras e simbols e batter quels el crap, elavurar elements da construcziun tenor plans, schablonas u models
Curs ordaifer il manaschi
Emprender ed exercitar las basas professiunalas en la pratica
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Attestat federal da qualificaziun "tagliacrappa AFQ" cun indicaziun da l'accent
Premissas
Furmaziun preliminara
- scola populara terminada
Pretensiuns
- inschign manual
- enclegientscha pratica
- imaginaziun dal spazi
- sentiment estetic
- constituziun ferma
- ferm dies ed organs da respirar sauns (pulvra)
- senza sturnizi
- pazienza e persistenza
Furmaziun supplementara
Curs
Purschidas da scolas d'art applitgà e da scolas spezialisadas e professiunalas sco da l'Associaziun svizra dals maisters sculpturs da crappa e tagliacrappa VSBS
Furmaziun da basa scursanida
Sculptur / sculptura da crappa AFQ
Examen professiunal superiur (EPS)
Maister / maistra tagliacrappa, maister sculptur / maistra sculptura da crappa
Scola auta spezialisada (SAS)
Studis en champs parentads, p.ex. Bachelor of Arts (SAS) en conservaziun u Master of Arts (SAS) en conservaziun-restauraziun. Tut tenor scola auta spezialisada valan differentas cundiziuns d'admissiun
Cundiziuns da lavur
Tagliacrappa lavuran en manaschis ch'elavuran e saneschan crappa natirala. Els pon era vegnì engaschads en fatschentas per material da construcziun u crappa natirala sco cussegliaders da clientella.
Ulteriuras infurmaziuns
Verein Bildung Naturstein VBN
3001 Bern
Tel: +41 31 380 19 22
URL: www.bildung-naturstein.ch
Revista professiunala:
"Kunst + Stein"