Lavurs
Graficras e grafichers sviluppan e creeschan cun agid da software moderna medias stampadas e digitalas, sco broschuras, paginas d'internet, placats ma er designs per emballadis. Els fan lavurs davent d'in simpel logo fin ad ina campagna da reclama cumpletta. Cun lur product visual gidan las spezialistas creativas ed ils spezialists creativs a transportar il messadi giavischà d'interpresas, d'instituziuns u da persunas singulas.
Lur lavurs èn las suandantas:
Descripziun exacta dal project
- chapir ils giavischs da la clientella, p.ex. campagna da reclama d'ina interpresa, campagna da prevenziun d'ina autoritad u ina gasetta che vul modernisar ses design
- enconuscher la gruppa en mira ed adattar correspundentamain il stil
- identifitgar la lingua che duai vegnir applitgada, p.ex. lingua da giuvenils, lingua academica u ina lingua generalmain chapaivla
- applitgar la lingua adattada e chapir il messadi, per ch'il text formulà saja consistent
- far in budget ensemen cun la clientella e resguardar p.ex. ils custs da material
Crear ils meds da communicaziun
- s'infurmar davart il tema dal messadi
- sa far ina survista davart las differentas medias e davart ils differents meds da reclama che duain vegnir applitgads, p.ex. placats, broschuras, paginas d'internet, apps, medias interactivas, gasettas, emballadis, locals d'exposiziun u stans da fiera
- resguardar en quest connex aspects sco la cumpatibilitad ecologica e la persistenza
- sviluppar ina strategia da communicaziun ed in stil per mintga medium, p.ex. logos, maletgs, pictograms, colurs, tipografia, layout, scrittiras, animaziuns u elements interactivs
- deducir in tema directiv da tut las ideas
- far e preschentar maletgs e fotografias per intermediar il messadi visual en ina moda originala
Realisaziun ed accumpagnament
- far ina skizza u in sboz per che la clientella possia s'imaginar il product e las ideas
- integrar las reacziuns da la clientella, p.ex. sche tschertas infurmaziuns duain vegnir accentuadas pli fitg u tge sentiments che duain vegnir svegliads tar la gruppa en mira
- crear il layout per il monitur u per il product stampà, quai vul dir preschentar il text ed il maletg en moda attractiva
- sviluppar apps per medias interactivas
- garantir che las finamiras da communicaziun vegnian realisadas durant l'entir process
- far enquistas tar la gruppa en mira u sa barattar cun las persunas spezialisadas da l'interpresa
- accumpagnar il process da stampa, p.ex. controllar copias ed il product definitiv
- controllar l'elavuraziun da las medias digitalas, p.ex. il programmar u l'administraziun da cuntegns
- consegnar – tut tenor la cumplexitad dal project – tut las infurmaziuns necessarias a la clientella, p.ex. ina instrucziun per l'app
Scolaziun
Durada
4 onns
Furmaziun pratica professiunala
- en in atelier grafic, in'agentura da communicaziun, in'agentura da reclama u ina chasa editura
Furmaziun da scola
1 fin 2 dis per emna en la scola professiunala spezialisada
Cuntegns didactics
- organisar projects e process da lavur
- retschertgar ed analisar basas da projects
- sviluppar strategias da communicaziun
- intermediar cuntegns e cumpetenzas
- sviluppar ed intermediar ideas
- realisar concepts da creaziun
- elavurar concepts da creaziun
Curs intermanaschials
L'emprendissadi na cumpiglia nagins curs intermanaschials.
Maturitad professiunala
Sche las prestaziuns da scola èn fitg bunas, pon ins frequentar la scola da maturitad professiunala durant la furmaziun fundamentala.
Diplom
Graficher / Graficra AFQ
Premissas
Furmaziun preliminara
- terminà scola obligatorica
Infurmaziuns:
- Blers manaschis d'emprendissadi pretendan d'avair absolvì in curs preliminar creativ en ina scola d'art applitgà.
- Las classas spezialisadas per grafica premettan ultra dal curs preliminar creativ ina procedura d'admissiun reussida. Quella cumpiglia per regla ina lezia creativa u in pensum creativ, l'inoltraziun d'ina mappa cun lavurs creativas ed in examen d'in u da plirs dis en la scola.
Pretensiuns
- abilitads creativas
- flexibilitad spiertala
- creativitad e mirveglias
- talent organisatoric
- forza da persvader
- voluntad da s'engaschar ed abilitad da supportar squitsch
- perseveranza
- gronda abilitad da lavurar en in team
Furmaziun supplementara
Curs
purschidas da scolas d'art applitgà, da scolas spezialisadas e da scolas professiunalas spezialisadas sco er da federaziuns
Examen professiunal (EP)
cun attestat professiunal federal p.ex. tipograf/-a per la communicaziun visuala u tecnicist/-a audio video
Examen professiunal superiur (EPS)
designer diplomà / designra diplomada da grafica
Scola spezialisada superiura (SSS)
p.ex. designer/-nra da communicaziun dipl. SSS
Scola auta spezialisada (SAS)
studis en il rom design, p.ex. bachelor of arts (SAS) en communicaziun visuala. Tut tenor la scola auta spezialisada valan differentas cundiziuns d'admissiun.
Relaziuns da lavur
Graficras e grafichers lavuran per regla en pitschens teams. Per chattar ideas collavuran els cun auters creaders, p.ex. cun fotografas, cun designers da medias interactivas u cun spezialists da reclama. Els èn er en contact cun stamparias e cun programmaders. Ils temps da lavur èn savens regulars. I dat però fasas da lavur intensivas, cura ch'i ston vegnir observads termins.
Graficras e grafichers sa movan sin in martgà da lavur, nua che la concurrenza è gronda. Els pon lavurar en ateliers grafics, en agenturas da communicaziun e da reclama, en chasas edituras, en stamparias u er en partiziuns da communicaziun internas d'interpresas. Las graficras ed ils grafichers han er la pussaivladad da lavurar en moda independenta. Questa professiun creativa è fitg attractiva per persunas giuvnas. Però èsi savens difficil da chattar in'emprima plazza da lavur suenter l'emprendissadi. Per pudair sa far valair sin ses champ, duessan graficras e grafichers profitar da las numerusas furmaziuns supplementaras ch'i dat.
Ulteriuras infurmaziuns
SGD Swiss Graphic Designers
3001 Berna
URL: www.sgd.ch
SGV Schweizer Grafiker Verband
8002 Turitg
URL: www.sgv.ch