Lavurs
Cuntellers e cuntelleras èn persunas spezialisadas per utensils da tagliar. Els, fabritgeschan, gizzan, reparan e vendan per exempel cuntels, forschs per il tegnairchasa ed il temp liber, guaffens per il mastergn sco per mazlers, cuntels da maisa u forschs da tagliar chavels.
Els exequeschan suandantas lavurs:
Producir nizzas
- malegiar e marcar sin ina platta la nizza che vegn fabritgada cun agid d’in dissegn u ina schablona, per exempel sin atschal, sin fier culà, sin materia sintetica u sin metals betg d’atschal, sco arom
- furmar atschal cun al resgiar, tagliar u mular
- storscher las nizzas en stadi chaud u fraid
- endirir las nizzas cun las temprar
- furar foras e tagliar differentas carenas per che manetschas e fixaziuns possian vegnir fixadas
- elavurar las nizzas tras pulir, mular, lavar e gizzar
producir manetschas e fixaziuns
- tscherner material, per exempel corna, lain u materials da hightec sco fibra da charvun u titan eloxà
- preparar e producir manetscha e fixaziun
construir instruments da tagliar
- nettegiar, barschunar e pulir las nizzas
- tatgar ensemen parts da metal e da materia sintetica
- zincar parts e dar si anti corrosiun per ch’i na fetschia nagina ruina
- metter ensemen ed adattar nizzas e manetscha
mantegnair e reparar utensils da tagliar
- giuditgar il stadi ed exequir lavurs correspundentas da mantegniment e reparatura
- remplazzar u adattar tocca, manetscha sco era plattas da metal e materia sintetica
- mular guaffens da tagliar e far stim da la furma ed il stadi
vender guaffens da tagliar
- vender utensils ed instruments fabritgads industrialmain u fatgs sezs
- cussegliar la clientella e l’instruir professiunalmain davart il diever
- exequir differentas incumbensas administrativas, per exempel tschentar si quints, far offertas u la contabilitad
Scolaziun
Durada
4 onns
Furmaziun en la pratica
En ina cuntellaria
Furmaziun en scola
1 fin 2 dis per emna a la scola professiunala, ensemen cun ils polimecanists / las polimecanistas AFQ
Roms professiunals
Planisaziun da las incumbensas e cussegliaziun da la clientella, elavuraziun d’utensils da tagliar, garanzia da la segirezza da lavur, da la protecziun da la sanadad e da l’ambient, basa tecnica, englais tecnic, tecnica da materials e da fabricaziun, tecnica da dissegn e da maschinas, electrotecnica e tecnica da regulaziun, projects interdisciplinars
Curs ordaifer il manaschi
Emprender ed exercitar a moda pratica la basa professiunala, 21 dis durant 4 onns, 21 dis durant 4 onns.
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Cunteller / Cuntellera AFQ
Premissas
Furmaziun preliminara
- temp da scola obligatoric terminà
Pretensiuns
- plaschair vi da l’elavuraziun da metal
- buna e ferma constituziun
- inschign manual
- moda da lavurar precisa
- perseveranza
- naginas allegrias cunter metals, ielis u dissolvents
Furmaziun supplementara
Curs
purschidas da la Swissmechanic, da la Schweiz. Metall-Union SMU e da diversas scolas professiunalas e scolas spezialisadas
Examen professiunal superiur (EPS)
p.ex. maister / maistra d’industria
Scola spezialisada superiura (SSS)
p.ex. tecnicist diplomà / tecnicista diplomada construcziun da metal
Scola auta spezialisada (SAS)
p.ex. Bachelor of Science (SAS) en tecnica da sistems u en tecnica da maschinas. Tut tenor scola auta spezialisada valan differentas cundiziuns d’admissiun.
Cundiziuns da lavur
Cuntellers e cuntelleras lavuran en lavuratoris pitschens u en interpresas pli grondas. En lavuratoris pitschens vegna anc lavurà artisanalmain e la glieud da professiun è responsabla per l’entir process da fabricaziun.
En manaschis da cuntellaria gronds e da renum internaziun èn els sa spezialisads sin ina specifica metoda da fabricaziun e lavuran cun persunas spezialisadas da la construcziun da maschinas u da la branscha da metal. Durant lavurs da batter il fier, nettegiar u endirir porta la glieud da professiun equipament ed egliers da protecziun.
Cuntellers e cuntelleras pon sa far independents suenter intgins onns d’experientscha pratica e cun ina furmaziun commerziala supplementara ed avrir ina atgna fatschenta da rauba da tagliar. Mo fitg paucas fatschentas scoleschan emprendists.
Ulteriuras infurmaziuns
Verband Schweiz. Messerschmiedmeister
8006 Zürich
URL: www.schweizer-messerschmiede.ch