Lavurs
Els exequeschan suandantas lavurs:
Construir bartgas
- leger ed interpretar plans e skizzas
- eleger material per la singula tocca da la bartga
- crear e duvrar furmas u schablonas da bists ord lain u ord rascha artifiziala
- fabritgar bists da bartgas: resgiar e splanar lain, storscher e rebatter il metal u furmar e glimar materia sintetica
- rinforzar ils bists, per ch’els sajan stabils e resistents a l’aua
- pulir, glimar, nettegiar, colurar e dar si lac a las surfatschas – uschè vegn la bartga embellida e fatga resistenta a las auras
- tschertgar u producir sez mobiglias per la decoraziun interiura: p.ex. sezs, letgs, cabinas u elements da cuschina
- montar e colliar indrizs electrics cun cabels
- montar bischens, lingias, pumpas e tancs per ils indrizs sanitars
- montar il motor ed il pilotadi
- montar indrizs da func, sistem da navigaziun ed auters accessoris sco vela, masts e l’ancra
Reparar e mantegnair bartgas
- controllar la tocca da las bartgas e remplazzar parts defectas
- nettegiar las bartgas, pumpar giu l’aua e las reparar
- auzar las bartgas cun agid da cranas e crics da sugas ord l’aua
- reparar ils donns da las bartgas suenter ina collisiun
- prender mesiras e far skizzas da la tocca da reserva sche necessari
- producir e montar tocca da reserva
- far las adattaziuns tenor las novas normas, p.ex. far pli aut la part davos u midar las glischs
- sgarar e glimar davent colur veglia
- dar si da nov las surfatschas
- garantir in deposit professiunal durant l’enviern
Scolaziun
Durada
4 onns
Furmaziun en la pratica
en chantiers
Furmaziun en scola
1 di per emna a la scola professiunala a Zofingen, Morges u Bellinzona
Roms professiunals
- fabritgar/reparar tocca da bartgas or da lain
- fabritgar/reparar tocca da bartgas or da material sintetic u da metal
- exequir lavurs da montascha e da modificaziun dals indrizs tecnics da bartgas
- manevrar bartgas e manischar cun sistems da transport e d‘auzar
- exequir lavurs da planisaziun, da controlla e da mantegniment
Curs ordaifer il manaschi
- fabritgar e reparar tocca da bartgas or da lain
- fabritgar/reparar tocca da bartgas or da material sintetic u da metal
- exequir lavurs da planisaziun, da controlla e da mantegniment
20 dis durant 4 onns, reparti sin 3 curs
Permiss dad ir cun bartga
Tar la scolaziun da basa tutga er l’acquist dal permiss d’ir cun bartga categoria A (bartgas a motor) e categoria D (navs a vela). Il manaschi da scolaziun surpiglia ils custs per mintgamai 10 lecziuns per l’instrucziun pratica.
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Construider / Construidra da bartgas AFQ
Premissas
Furmaziun preliminara
- Temp da scola obligatoric terminà
Pretensiuns
- inschign manual
- enclegientscha tecnica
- imaginaziun dal spazi
- movibilitad corporala
- buna sanadad e constituziun robusta
- plaschair vi dal sport d’aua
Furmaziun supplementara
Curs
purschidas da l’Associaziun svizra dals constructurs da bartgas tar divers temas sco electrotecnica, construcziun, cussegliaziun da clientella e vendita etc.
Furmaziun da basa scursanida
Survegliader da bartgas AFQ en 2 onns
Examen professiunal superiur (EPS)
maister constructur da bartgas / maistra constructura da bartgas
A l’exteriur
Studis a scolas autas spezialisadas en la Germania u Engalterra:
Bachelor of Engeneering en la construcziun da bartgas e tecnica da da mar, Bremen e Kiel, Germania
Bachelor of Science in Navigation and Maritime Science, Plymouth, Engalterra
Bachelor of Eneneering in Yacht and Powercraft Design, Southampton, Engalterra
Bachelor of Engeneerin in Ship Science, Southampton, Engalterra
Cundiziuns da lavur
Construiders e construidras da bartgas lavuran en chantiers en Svizra ed en l’exteriur. Els lavuran en teams pitschens en lavuratoris serrads u mez averts. Las bleras lavurs exequeschan els dentant en il liber. La lavur pretenda blera forza ed energia. Las persunas spezialisadas lavuran cun architectas, mecanists, maister-navigaturs e tgiraders da bartgas Durant la stagiun da bartgas è la capacitad da lavur pli auta, perquai che las persunas da professiun porschan servetschs d’agid en cas da pannas la fin da l’emna e durant firads.
Suenter intgins onns experientscha da lavur pon construiders e construidras da bartgas daventar schefs dal lavuratori u iniziar in’atgna fatschenta. Els pon er lavurar sco cussegliaders da clientella, en la vendita da bartgas ed accessoris u sco expertas tar la controlla da bartgas.
Ulteriuras infurmaziuns
Schweiz. Bootbauer-Verband
4800 Zofingen
URL: www.traumberuf-bootbauer.ch