Lavurs
Els exequeschan suandantas lavurs:
Preparar las lavurs
- prender encunter a bucca, en scrit u sin via electronica incumbensas da lur superiurs
- planisar las acziuns da lavur per els sezs e per las collavuraturas ed ils collavuraturs da lur team
- fixar ils termins per las incumbensas da nettegiament
- definir, tge metodas e tge products da nettegiar che ston vegnir duvrads, per exempel products adequats per in palantschieu da lain u per objects da vaider
- preparar ils apparats, las maschinas sco er il material ed ils products da nettegiament
- montar puntanadas, auzaders u plattafurmas spezialas per pudair nettegiar meglier tschertas surfatschas u tscherts lieus
- observar per quest intent las mesiras da segirezza
Nettegiar e tgirar
- duvrar correctamain las metodas ed ils apparats da nettegiament per schubregiar palantschieus, paraids, tualettas, duschas, fanestras u fatschadas
- spulvrar, scuar e far cun il tschitschapulvra, per exempel en abitaziuns ed en biros
- spulvrar, nettegiar e tgirar mobiglias
- schampunar u nettegiar tarpuns a sitg
- nettegiar cun maschinas fatschadas, fanestras e palantschieus, per exempel cun nettegiaders a pressiun auta, cun maschinas lavapalantschieus u cun apparats per nettegiar las fanestras
- tractar correctamain ils palantschieus e las paraids, per exempel surtrair, tractar cun tschaira, cun ieli, impregnar u sigillar
- remplazzar parts isadas e material da diever, per exempel sdratschs u tschitschs da tschitschapulvra
Terminar las lavurs
- controllar, che las lavurs sajan vegnidas fatgas correctamain
- surdar ils edifizis u ils meds da transport nettegiads a la clientella
- mantegnair las maschinas ed ils apparats sco er far pitschnas reparaturas
- controllar l'inventari dal material e far empustaziuns
- dismetter ruments en moda ecologica
Scolaziun
Durada
3 onns
Furmaziun en la pratica
En in manaschi da nettegiar
Furmaziun en scola
1 di l’emna a la scola professiunala
Roms professiunals
- preparar servetschs da nettegiament
- nettegiar edifizis ed objects
- terminar servetschs da nettegiament
- metter a disposiziun e mantegnair apparats, maschinas ed accessoris
Curs ordaifer il manaschi
Emprender la lavur pratica, approfundar ed exercitar las basas professiunalas, 21 dis durant 3 onns.
Maturitad professiunala
En cas da fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Spezialist / Spezialista da tecnica da nettegiament AFQ
Premissas
Furmaziun preliminara
- temp da scola obligatoric terminà
Pretensiuns
- enclegientscha pratica
- sanadad robusta
- buna constituziun e movibilitad corporala
- naginas allergias (en connex cun products da nettegiar)
- senza sturnizi
- abilitad da lavurar en in team e buna demananza
- plaschair da lavurar en differents lieus
Furmaziun supplementara
Curs
Purschidas da scolas spezialisadas e da scolas professiunalas spezialisadas sco er da l'Associaziun da las interpresas svizras da nettegiament Allpura, davart temas sco chemicalias, cumbat cunter parasits u nettegiament da fatschadas.
Examen professiunal (EP)
Manader / Manadra da sectur Tecnica da nettegiament cun attestat professiunal federal
Examen professiunal superiur (EPS)
Nettegiader / Nettegiadra d'edifizis dipl. u Manader / Manadra da facility management e maintenance cun diplom federal
Scola spezialisada superiura (SSS)
Scolaziuns en secturs specifics parentads, p.ex. mainagestiun en facility management dipl. SSS.
Scola auta spezialisada (SAS)
Studis en secturs parentads, p.ex. bachelor of science en facility management. Tut tenor la scola auta spezialisada valan differentas cundiziuns d'admissiun.
Cundiziuns da lavur
Spezialistas e spezialists da tecnica da nettegiament lavuran sulets u en pitschens teams. Savens èn els sin viadi e ston adina puspè lavurar en novs conturns. Perquai ch'els dovran chemicalias per tschertas lavurs, ston els observar prescripziuns da segirezza e purtar vestgadira da protecziun adattada, per exempel guants u ina mascra. Spezialistas e spezialists da tecnica da nettegiament ston mintgatant lavurar la saira e la fin d'emna.
Els lavuran savens per pitschnas interpresas da nettegiament. Els pon er sa far independents e fundar in'atgna interpresa. Per quest intent èsi impurtant da tgirar ils contacts cun la clientella ed adina da s'infurmar davart ils novs materials, products ed apparats. Mastergnantas e mastergnants da la branscha da nettegiament bain scolads èn dumandads sin il martgà da lavur.
Ulteriuras infurmaziuns
Allpura Associaziun da las interpresas svizras da nettegiament
4613 Rickenbach SO
URL: www.allpura.ch