Lavurs
Lur lavurs èn las suandantas:
Tgirar e survegliar animals
- passentar temp cun animals ch'èn collocads en chasas d'animals, p.ex. chauns, giats, utschels e cunigls
- retschaiver e proveder animals mess a l'abandun, avant che tals chattan novs possessurs
- tgirar animals d'experiment per instituziuns da perscrutaziun u labors ed als registrar en inventaris
- tgirar animals selvadis en zoos u en parcs da selvaschina
- observar leschas davart il commerzi, la tegnida ubain davart la dismessa d'animals morts
- sustegnair la clientella e respunder dumondas
Tgirar animals
- allevar animals ed en quest connex tscherner ils temps da paregliament e las metodas d'allevament
- tegnair net ils spazis da viver e mantegnair las cundiziuns climaticas, p.ex. la temperatura u l'umiditad da l'aria
- tgirar il pail e las griflas dals animals, p.ex. lavar e barschunar il pail e tagliar u glimar las griflas
- preparar il pavel ed en quest connex resguardar il nutriment dals differents animals
- survegliar la sanadad dals animals, enconuscher ils sintoms da las pli frequentas malsognas d'animals
- clamar in veterinari en cas d'ina malsogna u d'ina blessura ed al sustegnair durant il tractament
- cumbatter resp. guarir malsognas e parasits
Tegnair en urden indrizs
- construir clasiras, aquaris, terraris e chabgias per il transport
- preparar sternim, structuras, pussaivladads da moviment, da rampignar e da sa retrair per ils animals
- nettegiar e controllar mintga di las chabgias e las clasiras sco er dischinfectar tenor ils standards prescrits ed en intervals prescrits
Scolaziun
Durada
3 onns
Direcziuns d’emprendissadi
- animals da pensiun
- animals d’experiments
- animals selvadis
Furmaziun en la pratica
en ina chasa d'animals, en in labor, en in parc d'animals selvadis u en in zoo
Furmaziun en scola
1 di per emna en la scola professiunala spezialisada
Roms professiunals
- biologia e tegnida d’animals
- igiena e malsognas
- organisaziun dal manaschi e logistica
- etica professiunala e dretg
- communicaziun e contact cun la clientella
- roms supplementars tut tenor sectur professiunal
Curs ordaifer il manaschi
emprender, approfundar ed exercitar las basas professiunalas:
• 15 dis durant 3 onns per ils secturs professiunals «animals da chasa» ed «animals selvadis»
• 17 dis durant 3 onns per il sectur professiunal «animals d'experiment»
Maturitad professiunala
sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Diplom
Tgirader / Tgiradra d'animals AFQ
Premissas
Furmaziun preliminara
- terminà la scola obligatorica
Pretensiuns
- plaschair d'ir enturn cun animals
- abilitad e sensibilitad per ir enturn cun animals e cun glieud
- bun dun d'observar ed attenziun
- senn per lavurs manualas e praticas sco er plaschair da s'engaschar corporalmain (forza corporala)
- buna sanadad e naginas allergias
- senn per nettezza resp. prontezza da far lavurs malnettas
- nagin disgust envers odurs, excrements ed animals spezials
- fidadadad e senn da responsabladad
Furmaziun supplementara
Curs
purschidas da scolas spezialisadas e da scolas professiunalas spezialisadas sco er da l'Associaziun svizra per la furmaziun en tgira d'animals, tierpfleger.ch
Tgiradras e tgiraders d'animals èn obligads da sa perfecziunar durant almain 4 dis entaifer 4 onns, quai tenor l'Ordinaziun davart la protecziun dals animals OPAn dals 23 d'avrigl 2008 (versiun dal 1. da favrer 2024).
Exteriur
p.ex. Maister tgirader / Maistra tgiradra d'animals, scolaziun en Germania Dapli infurmaziuns porscha la Bundesagentur für Arbeit, arbeitsagentur.de.
Scola auta spezialisada (SAS)
studis en secturs parentads, p.ex. bachelor of science en agronomia
Tut tenor la scola auta spezialisada valan differentas cundiziuns d'admissiun.
Cundiziuns da lavur
Tgiradras e tgiraders d'animals lavuran en rotaziun durant tut ils dis da l'emna ed han uras da lavur irregularas. Ellas ed els lavuran en labors, cunzunt ensemen cun biologas e chemicists. En chasas d'animals han ellas ed els savens contact cun la clientella. Cun ir enturn cun animals sto la glieud da professiun giuditgar bain il cumportament dals animals e sa proteger tut tenor spezia d'animal cunter morsas, tissientadas e sgrifladas.
Tut tenor il sectur professiunal chattan tgiradras e tgiraders d'animals plazzas en labors, en manaschis industrials, en saluns da tgira d'animals ed en parcs d'animals. En chasas d'animals datti però mo paucas plazzas da lavur e savens han las instituziuns mancanza da daners. Perquai è il martgà da lavur tendì. Cun l'experientscha da lavur respectiva e cun las qualificaziuns correspundentas pon ellas ed els surpigliar la direcziun da manaschis.