Lavurs
Cun lur lavur contribueschan tecnologs e tecnologas da drenascha essenzialmain a la drenascha dals abitadis ed a la rimnada ed al transport d’auas persas. Els nettegian, svidan, mantegnan, controlleschan e reparan implants da drenascha: lingias da colliaziun en cuschina, bogn, tualetta e pastrign, sculs da plauns, tumbins da controlla, chanals dals tetgs, lingias d’aua da funtauna, chanalisaziuns principalas, drenaschas d’immobiglias euv.
Tecnologas da drenascha lavuran en manaschis dal mantegniment da chanals, da l’inspecziun da chanals u en la chanalisaziun. Per quest motiv vegnan differenziads en la scolaziun trais accents: mantegnair implants da drenascha, intercurir implants da drenascha, sanar implants da drenascha.
En l’accent mantegnair s’occupan tecnologs da drenascha dal nettegiament professiunal e dal mantegniment dals implants. Tut tenor polluziun elegian els in proceder adattà. Sediments stinads en lingias sco p. ex. chaltschina allontaneschan els a moda mecanica cun agid d'utensils. Stuppadas allontaneschan els a moda idrodinamica, quai vul dir cun pressiun auta d’aua.
En l’accent intercurir controlleschan els ils implants da drenascha. Cun agid d’ina camera teleguidada (televisiun a chanal) localiseschan els elements da construcziun, lingias e bischens defects e donnegiads. Els controlleschan e documenteschan il stadi da la rait da bischens ed infurmeschan l’incumbensader. Sch’els chattan donns, cusseglian els lur clients davart metodas da sanaziun pussaivlas.
En l’accent sanar stattan la reparatura e la renovaziun d’implants da drenascha en il center. Donns punctuals reparan tecnologs da drenascha cun il roboter da chanal, p. ex. colliaziuns da bischens che perdan aua. Donns pli gronds reparan els cun la metoda Inlining, latiers vegn tratg en il chanal in uder u in bischen surtratg cun rascha.
Tecnologas da drenascha enconuschan ils privels en lur professiun. Ellas resguardan las prescripziuns da la segirezza da lavur e da la protecziun da la sanadad. Plinavant segireschan ellas cun mesiras adattadas la protecziun da l’ambient e da las auas.
Scolaziun
Basa legala
Ordinaziun federala 10-9-2013 (versiun dal 1-1-2018)
Durada
3 onns
Accents
- mantegnair implants da drenascha
- intercurir implants da drenascha
- sanar implants da drenascha
Furmaziun en la pratica
En in manaschi dal mantegniment dal chanal, da l’inspecziun da chanals u da la chanalisaziun
Furmaziun en scola
1 di per emna a la scola professiunala a Zug
Roms professiunals
- planisar, preparar lavurs e rapportar davart lavurs
- nettegiar implants da drenascha
- mantegnair implants da drenascha
- intercurir implants da drenascha, segirar il mantegniment, la segirezza e la protecziun da l’ambient
Curs ordaifer il manaschi
Tar differents temas
Maturitad professiunala
Tar fitg bunas prestaziuns po la scola da maturitad professiunala vegnir frequentada durant la scolaziun da basa.
Diplom
Attestat federal da qualificaziun "tecnolog / tecnologa da drenascha AFQ"
Premissas
Furmaziun preliminara
- scola populara terminada
Pretensiuns
- dun pratic
- enclegientscha per temas tecnics
- imaginaziun dal spazi
- buna constituziun corporala
- moda da lavurar autonoma
- punctualitad e fidadadad
- buna demananza
- abilitad da lavurar en ina gruppa
- senn da responsabladad ed agir ecologic
- nagina tema da plazza
Furmaziun supplementara
Curs
purschidas da scolas spezialisadas e professiunalas sco er da la federaziun da tetg da la branscha da mantegniment da chanalisaziuns (advk), p. ex. operatur / operatura da televisiuns a chanal
Scola spezialisada superiura (SSS)
(tar furmaziun preliminara correspundenta) curs en differents secturs
Scola auta spezialisada (SAS)
(tar furmaziun preliminara correspundenta) studis en differents secturs
Cundiziuns da lavur
Tecnologs e tecnologas da drenascha lavuran en manaschis dal mantegniment dal chanal, da l’inspecziun da chanals u da la sanaziun da chanals. I sa tracta per il solit d’affars pitschens u mesauns cun 5 fin 20 collavuraturs, en la branscha datti er paucs manaschis gronds.
Els lavuran bunamain adina en in pitschen team. La gronda part dal temp èn els en viadi, savens er surregiunal. I po er esser ch’els ston star sur notg ordaifer.
Els prestan servetsch da pichet, mintgatant er servetschs durant la fin d’emna, quai che pretenda flexibilitad.
Ulteriuras infurmaziuns
Ausbildungsdachverband der Kanalunterhaltsbranche (advk)
Sekretariat
Wölflistr. 5
Postfach 65
3000 Bern 22
Tel: 031 370 85 85
URL: www.advk.ch