Lavurs
Practicistas e practicists da tecnica da chasa lavuran en in manaschi da la branscha da tecnica d’edifizis. Els gidan las installaturas ed ils installaturs a montar indrizs da la tecnica da chasa: stgaudaments, ventilaziuns ed indrizs d’aria cundiziunada, installaziuns sanitaras u lavurs da toler, tut tenor l’accent da la furmaziun da basa.
En il lavuratori preparan practicists da tecnica da chasa ils elements da construcziun. Els lavuran cun materials da fabricaziun sco metal e materia sintetica. En manaschis da stgaudaments e manaschis sanitars resgian els ils bischens. Els taglian crennadiras e storschan ils bischens en la furma giavischada. En tolarias e manaschis da ventilaziuns taglian els elements da construcziun or da tola ed als collian cun il fier da lutegiar u cun il bugliaduir.
Practicists da tecnica da chasa lavuran savens er en il magasin. Els preparan il material ed ils utensils che vegnan duvrads sin il plazzal. U ch’els fan urden cun il material che vegn enavos ed al deponan en las curunas. Cun lavurs da mantegniment pitschnas procuran els ch’ils utensils, ils guaffens e las maschinas sajan adina pronts per il diever.
Sin il plazzal monteschan practicists da tecnica da chasa ils indrizs ensemen cun lur schefs. Els enconschan ils privels sin il plazzal e schurmegian sasezs e lur collegas da lavur. Els resguardan las prescripziuns da segirezza e portan adina lur equipament da protecziun persunal.
Per proteger l’ambient resguardan practicists da tecnica da chasa las prescripziuns da la protecziun da l’ambient. Elements da construcziun duvrads ed auters ruments dismettan els tenor las prescripziuns dal manaschi.
Scolaziun
Basa legala
Ordinaziun federala 12-12-2007 (stadi dal 1-1-2018)
Durada
2 onns
Accents
- stgaudament
- ventilaziun
- indrizs sanitars
- stagnaria
Furmaziun en la pratica
En in manaschi da la branscha da tecnica d’edifizis
Furmaziun en scola
1 di l'emna a la scola professiunala
Cumpetenzas professiunals
- Enconuschientschas professiunalas en la preparaziun da lavurs
- Tecnica da montascha
- Materials da fabricaziun
- Enconuschientschas davart construcziuns
- Utensils e maschinas
- Elavuraziun da metal e da materia sintetica
- Quints
- Persistenza
- Segirezza da la lavur
- Administraziun
Curs ordaifer il manaschi
Emprender ed exercitar a moda pratica las basas professiunalas
Diplom
Attest federal professiunal "practicist / practicista da tecnica da chasa AFP"
Premissas
Furmaziun preliminara
- scola populara cun pretensiuns da basa
Pretensiuns
- inschign manual
- enclegientscha pratica
- movibladad corporala
- sanadad robusta
Furmaziun supplementara
Curs
purschidas da scolas spezialisadas e professiunalas, dals centers da furmaziun da suissetec, da la Scola tecnica professiunala svizra Winterthur sco era da manaschis da la branscha da tecnica d’edifizis
Attestat federal da qualificaziun AFQ
practicists / practicistas da tecnica da chasa AFP pon frequentar ina furmaziun da basa scursanida sco installatur / installatura da stgaudaments AFQ, construider / construidra da ventilaziuns AFQ, installatur sanitar / installatura sanitara AFQ u toler / tolera AFQ (entrada en il 2. onn da furmaziun da basa).
Suenter èn pussaivlas las medemas furmaziuns supplementaras sco per las furmaziuns professiunalas da basa da trais onns ch’èn menziunadas survart.
Cundiziuns da lavur
Practicists da tecnica da chasa lavuran en in manaschi da la branscha da tecnica d’edifizis, tut tenor l'accent da lur scolaziun en in manaschi per installaziuns da stgaudaments, installaziuns da ventilaziuns u installaziuns sanitaras ubain en in manaschi cumbinà stgaudaments-ventilaziuns-installaziuns sanitaras resp. tolaria-installaziuns sanitaras.
In contract collectiv da lavur (CCL) per la branscha da tecnica d’edifizis svizra reglescha las relaziuns dal dretg da lavur tranter ils partenaris socials.
Ulteriuras infurmaziuns
Associaziun svizra e dal Liechtenstein da tecnica d'edifizis (suissetec)
Auf der Mauer 11
Chascha postala 1768
8021 Turitg
Tel: 043 244 73 00
URL: www.suissetec.ch
Revista professiunala:
"HK-Gebäudetechnik"